كم مرّة ادْرُس لِك..وأقول انتبه زين =الوقت ما قصّـر و كفّـى و وفّـى
أدنى زعَل ياخذ على خاطري ليـن=اشِـبّ و أيّـام اللهب مـا تطفّـى
حتى دموعي بالسلف جبتهـا ديـن=من كُثـر ماتنـزف لشـيٍّ تخفّـى
لاتعتذر وش تُجْبرآسف و مخطيـن=ولا ترجّانـي..ولا تـذْكُـر أفّــا
واِنْ جيت تبكي لي..أنا والبكى وين=ماعـاد حتـى بالدمـوع أتشفّـى
من وين ماوجّهْت واطلَقْت لي عين=حتى بقايـا الشـوف للعيـن قفّـى
ماباقي اِلاّ نفضة اغبـار..و يديـن=تصْفُق على ماصاد سـاقٍ تحفّـى
أيام وشهور..ومحطّـات و سنيـن=خذا الزمن كامل حسابـه و صفّـى
تدري..خُذ العاتق..وشبّ الضلاعين=يمكن معا بـردي ضميـرك يدفّـا
بس انْشِدِك..علّمني..أرجاك من فين=آخذ عـزا راسي..وقلبـي توفّـى